行行出狀元!! 處處有生機!!
五十年代, 小童要理髮, 阿媽俾兩毫子,
去冷巷口排隊, 坐樈仔睇公仔書, 等候
剃頭, 我排第三個, 好快就輪到我啦!
阿叔問: 細路要剪乜嘢裝呀! 有花旗裝,
陸軍裝, 紅毛裝, 和尚頭, B B裝, 我話:
要剃光頭, 戰前理髮師, 都係呌剃頭佬,
和平後, 有上海理髮廳, 理髮技術一流,
老闆一聲: 有客人歡迎光臨, 理髪師立
即上前招呼, 右手遞毛巾, 左手遞香煙,
理髮全套...剪髮.洗頭.剃鬚.採耳.吹波,
都係收一蚊七毫咋!理髮師(暗語),
剃頭佬....係呌"摩頂友"
洗 頭.... = = "槳 草"
剃 鬚.... = = "捉 蟻"
採 耳.... = = "打 雀"
吹 波.... = = "噴 草"
重有理髮師制服編號由 1---10.唔記得,
(如果網友知悉的,敬請賜教, 薄金酬謝!! )
回憶50年代,我曾經在上環水坑口巴士總站,做什工
掃車廂內D垃圾,又要打開車頭蓋,在水廂內加滿水,
因為好耐才有一部巴士回來,可以休息吓,踎在員工
茶水部(蛇王),經常聽到D唔明白嘅員工對話,為了好奇心,
每句講話我都記入腦海,各位老友記,如果您們搭巴士,
曾否聽到巴士員工講(術語)呢? 現覆述
(術語)如下: 1) 瞓怩頸==??
( 司機埋站,頭向右轉,扮睇唔到 )
2) 放死魚==???
( 接近到終點站,有客上車買票,就給舊票他/她 )
3) 監生吞==???
( 明知那位,尚未買車票,待落車才呌買票,車費就自己袋啦 )
4) 踢假波==??
( 售票員配合司機,埋站作狀停車,售票員打響叮叮,司機開車 )
5) 憧眼瞓==??
( 搭客要落車,冇呌有落,售票員見車站無客,就合埋眼,無打鐘 )
6) 大腳踢==????
( 同一路線巴士,跟尾追上,就司機配合售票員,叮叮兩聲,"飛站")
7) 擺路祭==???
( 故意投訴壞車,例如:冇燈,死火,門壤,車頭路牌跌落,冇指揮燈 )
以上我認識一位慈祥巴士司機,
他靜靜告訴我, 現在呢D情景不會再發生,
春遊芳草地! 復活節快樂!
昨日風高氣爽, 扮演老人獨行俠,
前往離島一天行山樂, 途中遇到
有男女老少一家親, 亦有情侶結
伴同遊, 只有我獨行, 樂也悠悠!!
首先陪伴老妻食早餐, 然後整裝
出門, 臨行吩咐她記得番熱午飯,
我會隨時用手機聯絡, 提醒飯後
要食兩粒半葯, 患病多年(糖尿病),
我已經用七格葯丸盒分好, 希望
唔會攪錯, 始終都係有些心掛念!
我開始由索古灣起步, 向著南丫島
前進, 中午在茶餐廳食星洲炒米,
咖哩香又夠辣, 真唔錯, 下次再來,
搭船回程, 因為很久冇行山, 累喇!
回到家中已是晚飯時間, 煮飯囉!
需然感覺辛苦, 都係....心曠神怡!
